މުސްލިމުންގެ އާބާދީ ބޮޑު ފަސް ގައުމެއްގެ ރައްޔިތުން އެމެރިކާއަށް އެތެރެވުން މަނާކުރަން ރައީސް ޑޮނަލްޑް ޓްރަމްޕް ނެރުއްވި އަމުރަށް އެ ގައުމުގެ ސުޕްރީމް ކޯޓުން ތާއީދުކޮށްފި އެވެ.

މި ހުކުމާއެކު މުސްލިމުންގެ އާބާދީ ބޮޑު ލީބިޔާ، އިރާނު، ސޯމާލިއާ، ސީރިއާ އަދި ޔަމަނުގެ ގިނަ ރައްޔިތުންނަށް އެމެރިކާއަށް އެތެރެވުން މަނާ ވާނެ އެވެ.

ސުޕްރީމް ކޯޓުގެ ނުވަ ފަނޑިޔާރުންގެ ތެރެއިން ފަސް ފަނޑިޔާރުން ނިންމެވީ އެއަމުރަކީ މުސްލިމުންނާ މެދު ތަފާތުކޮށް ނެރެފައިވާ އަމުރެއް ނޫން ކަމަށާއި އެފަދަ އަމުރެއް ނެރުއްވުމަކީ އެމެރިކާގެ އިމިގްރޭޝަން ގާނޫނުގެ ދަށުން ރައީސް ޑޮނަލްޑް ޓްރަމްޕަށް ލިބިގެންވާ ބާރެއްކަމަށެވެ.

މިދިޔަ ސެޕްޓެމްބަރު މަހު ރައީސް ޓްރަމްޕް ނެރުއްވި އެއަމުރުގައި ވަނީ އުތުރު ކޮރެއާގެ އިތުރުން ވެނެޒުއޭލާގެ ބައެއް އޮފިޝަލުންވެސް އެމެރިކާއަށް ވަނުން މަނާކޮށްފައެވެ.