ދ. ކުޑަހުވަދޫން ދޫކުރުމަށް ކަނޑައަޅާފައިވާ ބަންޑާރަ ގޯތީގެ އަދަދު 345 އަށް އިތުރުކުރަން އެ ރަށު ކައުންސިލުން ނިންމައިފިއެވެ.

ކުޑަހުވަދޫ ކައުންސިލުން ކުރި އިއުލާނެއްގައި ބުނެފައި ވަނީ ދިރިއުޅުމަށްޓަކައި އެރަށުން 243 ބަންޑާރަ ގޯތި ދޫކުރުމަށް ކައުންސިލުން 30 އޮގަސްޓް 2022ގައި ކޮށްފައިވާ އިއުލާނާ އެއްގޮތަށް އެކައުންސިލަށް ލިބިފައިވާ އިހްތިޔާރުގެ ދަށުން އެ އަދަދު 102 ގޯއްޗަށް އިތުރުކުރުމަށް ނިންމާފައިވާ ކަމަށެވެ. އެހެންކަމުން މިބުރުގައި ކުޑަހުވަދޫން ދޫކުރާ ބަންޑާރަ ގޯތީގެ ޢަދަދަކީ 345 ކަމުގައި މިއަދު އެ ކައުންސިލުން ނިންމާފައިވާ ކަމަށް އިއުލާނުގައި ވެއެވެ.

ކައުންސިލުން ބުނީ މި 102 ގޯތި އިތުރުކުރުމަށް ނިންމާފައިވަނީ، ކުޑަހުވަދޫ ބަންޑާރަ ގޯތި ދޫކުރުމަށް އެކުލަވާލާފައިވާ ކައުންސިލުން ފާސްކޮށްފައިވާ ގައިޑްލައިންގެ "A" ކެޓަގަރީގެ ބަޔަށްކަމަށެވެ. އަދި ގޯތި ދޫކުރުމަށް 30 އޮގަސްޓް 2022ގައި ކޮށްފައިވާ ޢިއުލާނާ އެކު އެއްކަރުދާސް ކޮށްފައިވާ ޗާޓުގައި ފާހަގަކޮށްފައިވާ، މި ބުރުގައި ދޫކުރާ ގޯތިތަކުގެ ނަންބަރުތަކަށް ބަދަލުގެނެވިފައިވާތީ، އަލުން ތަރުތީބް ކޮށްފައިވާ ނަންބަރުތައް އެނގޭނޭ ޗާޓް މިއަދުގެ އިއުލާނާއެކު އެއްކަރުދާސް ކުރެވިފައިވާ ކަމަށް ކައުންސިލުން ބުނެއެވެ.

ކުޑަހުވަދޫން ދޫކުރާ ގޯތީގެ އަދަދު 345 އަށް އިތުރުކުރަން ނިންމާފައިވާއިރު، އެރަށު ކައުންސިލުން މިއަދު ބަންޑާރަށް ގޯޗަށްއެދި ފޯމް ހުށަހެޅި ފަރާތްތަކަށް ޕޮއިންޓް ދީފައިވާ ގޮތުގެ ވަގުތީ ލިސްޓް ވެސް އާއްމުކޮށްފައެވެ.