ކުޑަކުދިންގެ އަދުލުގެ ޤާނޫނުގެ 80 ވަނަ މާއްދާގެ 01 ގައި ބަޔާންކޮށްފައިވާ ފުރަތަމަ ރެޒިޑެންޝަލް ޓްރީޓްމަންޓް ސެންޓަރުގެ ބިންގާ އަޅައިފިއެވެ.

ދ.ކުޑަހުވަދޫގައި ބިނާކުރާ މި ސެންޓަރުގެ ބިންގާ އަޅުއްވައިދެއްވީ ހޯމް މިނިސްޓަރު ޢިމްރާނެވެ.

ކުޑަކުދިންގެ އަދުލުގެ ޤާނޫނުގެ 80 ވަނަ މާއްދާގެ 01 ގައި ބަޔާންކޮށްފައިވާ ރެޒިޑެންޝަލް ޓްރީޓްމަންޓް ސެންޓަރުތަކަކީ، ކޮންމެ ކުއްޖެއްގެ ހާލަތަށް ބިނާކޮށް، އެ ކުއްޖާއަށް ބޭނުންވާ ޚާއްސަ ފަރުވާތައް ދެނެގަނެ، އެ ފަރުވާ ނުވަތަ ފަރުވާތައް ދިނުމަށްޓަކައި އެ ފަރުވާގެ މުއްދަތަށް ކުދިން ދިރިއުޅޭނެ ގޮތަށް ހަދާ މަރުކަޒުތަކެކެވެ.

ކުޑަހުވަދޫގައި ޢިމާރާތްކުރާ ފުރަތަމަ ސެންޓަރުގެ މަސައްކަތް ހަވާލުކޮށްފައިވަނީ ވީ އަވާ އިންވެސްޓްމަންޓް ޕްރައިވެޓް ލިމިޓެޑާއެވެ. ދެ ފަންގިފިލާ ހިމެނޭ މި ޢިމާރަތް ބިނާކުރުމުގެ މަސައްކަތް ހަވާލުކޮށްފައިވަނީ 450 ދުވަހުގެ ތެރޭގައި ނިންމާގޮތަށެވެ. މި މަޝްރޫޢުއަކީ 21 މިލިއަން 06 ލައްކަ އަށްވުރެ ގިނަ ރުފިޔާ ހޭދަކޮށްގެން ކުރިއަށް ގެންދަން ނިންމާފައިވާ މަޝްރޫޢެކެވެ.